شهر العسل - الواتس آب

عندي واحد صاحبي طبيب أسنان وبيقضي خدمته العسكرية كعسكري في إحدى الاماكن النائيه ..الولد ده حليوه وأمور وكان بيعجب البنات عندنا في الكليه..المهم قائد المنطقه بتاعته عرف انه من القاهره وبشكل او بآخر عرف انه بيسوق عربية ابوه اللي في معظم بيبقى خارج القاهره .. بقى يبعته مأموريات كتير وبقى كل إسبوع تقريبا يجي القاهره يروح يخلص ورق وينزل تاني ..وفي مره من المرات القائد بتاعه قاله معلش روح للمدام في البيت هات ورقه من هناك وخد المدام وديها تعمل اشعه على الحوض عشان بيوجعها شويه ورجعها البيت تاني ..صاحبنا قاله :تمام يافندم
وراح صاحبنا العسكري لباب البيت وفتحتله بنت القائد ..فضلت واقفه قدامه شويه وراحت نادت امها .. الولد وصفلي بنت القائد انها اقرب ماتكون الى الفنان سليمان عيد ...خلص الموضوع ورجع صاحبنا المنطقه بتاعته في انتظار مهمات اخرى
وبينما هو في العنبر جاله العسكري السكرتير بتاع قائد المنطقة بيقول له القائد عايزك في مكتبه
راح الولد وهو فاكر انه هايتكلف بمأموريه جديده ..دخل المكتب وادى التحيه العسكريه راح القائد طلب منه انه يقعد ..راح قعد ودار بينهم الحوار التالي :

-بص ياحسن انا بعتبرك زي ابني الصغير
-ده شرف ليا يافندم
-انا عايزك في موضوع مهم
-خير يافندم
القائد طلع النظاره وطلع موبايله وفتحه واداه لحسن العسكري صاحبنا وقاله : شايف الصوره اللي في الخلفيه دي يابني
-اه يافندم .. مين دي يافندم
-دي رقيه بنتي
-ماشاء الله يافندم .. تعيش وتفتكر
-ياولد رقيه بنتي اللي فتحتلك الباب لما كنت عند المدام
-معلش يافندم ..ماخدتش بالي
- بص ياحسن ... زي ماقلتلك انت ابني الصغير وانت شاب كويس ومجتهد.. ودكتور سنان .. انا هادخل معاك دغري ..انا عايز اخطبهالك
- صاحبنا العسكري حس ان في جردل بيبي ساقع اتدلق عليه وقال: يافندم ده يشرفني بس انا لسه في أول الطريق ولا عندي شقه ولا عندي عربيه ولا دخل شهري
-عندها شقه ..والسواق بتاعي تحت أمرك وهادخلك ظباط متخصصين تشتغل في الجيش
-اه يافندم بس انا مش جاهز دلوقتي
-احنا مجهزين كل حاجه ...احنا بنشتري راجل يابني
-يافندم بس...
-مفيش بس .. انا هانزلك اجازه اسبوع تشوف العروسه و تقول لابوك وامك وترجعلي ..اسمع منك كلمة موافق
-تمام يافندم
-مواااافق ياحسن
-موافق يافندم
-على بركة الله
لبس العمود ، ههههههههههههههههه